Punktar

Var kosinn í stjórn 10. deildar Félags Leikskólakennara
Fór á aðalfund Félags leikskólakennara og skemmti mér konunglega
Bý enn á Vallarsvæðinu og vinn enn í leikskólanum Velli
Álagið hefur farið minnkandi með hverjum deginum
Ég var næstum kulnaður í vinnunni en tókst að snúa þróuninni við
Byrjaður að kenna 10 stykkjum af 5 ára gömlum strákum að lesa
Er að spá í að fara í MPM nám

Ekki fleiri punktar að sinni... kannski segir það margt um hugarástand mitt. Ég geri ekkert nema vinna, glíma, knúsa kærustuna og spila. Ekki gott líf það

Ég sem gamalmenni

Ég á eftir að vera hrikalegt gamalmenni. Ég fékk endanlega staðfestingu á því í þessari viku. Ég fékk streptókokkasýkingu í síðustu viku og fékk auðvitað sýklalyf við þeim andskota. Ég var rosa duglegur að taka það inn. Um helgina þá byrjaði ég að finna fyrir miklum kviðverk. Ég talaði við lækni á sunnudaginn sem hlustaði og þuklaði á mallakútnum á mér. Niðurstaða hans var sú að ristilinn væri bara ekkert starfandi. Hann sagði að það stafaði eflaust vegna sýklalyfjanna og iðraólgunni sem er fylgifiskur minn. Hann tjáði mér að eta al-bran og vona að hann hrykki í gang.

Mánudagurinn var helvíti, kaldsviti og fáránlegur rembingur í hvert skipti sem ég prumpaði. Aðfaranótt þriðjudags var líka helvíti þar sem sársaukinn var kominn yfir öll velsæmismörk, þá hefur maturinn safnast of mikið saman í iðrunum og allt var orðið uppþembt og rosa vesen á öllu. Ég gerði jógaæfingar, át verkjalyf og bjó mér til hitapoka úr samkaup-plastpoka og handklæði og þannig tókst mér að sofna. Vaknaði í morgun verkjalaus og tókst síðan að losa stífluna um klukkan þrjú í dag. Er síðan búinn að fara á klósettið um þrisvar sinnum og losa vind eins og mér sé borgað fyrir það.

Ég er nú að nálgast 31. aldursár mitt og hægðirnar mínar valda mér miklu hugarangri. Hvernig ætli þetta verði þegar ég er að nálgast sextugsaldurinn?

Fyrsti póstur ársins 2008

Jæja þá er komið að því. Fyrsti póstur ársins 2008 er kominn í loftið. Það eru komnir um 2 mánuðir síðan ég skrifaði síðast og ég býst auðvitað við því að fólk hefur kíkt reglulega hingað í þeirri von að sjá eitthvað nýtt eftir mig. En nú loksins er eitthvað komið.

Þar sem þessi póstur var byrjaður þá ætla ég bara enda hann hérna.. svo fólk verði ekki of ruglað.

Sögur

Eins og þið vitið þá hef ég ekki skrifað mikið síðustu vikur (og mánuði), ástæðan er sú að ég er niðursokkinn í vinnuna mína. Vinnan mín fjallar um að kenna börnum hvernig á að hegða sér í stofnanaumhverfi, en aðallega að passa börn.

Í dag þá fórum við í Kirkjuferð og presturinn var að segja sögu, var að tala um kertin á aðventukransinum og benti á síðasta kertið (Betlehemskertið) og spurði hvort einhver vissi hvað það hét, svo var ekki og þá sagði hann "hvar fæddist jólabarnið?"
Þá heyrðist í snillingnum sem er í mínum hóp "Það var í maganum á mömmunni og kom úr honum"
Og þá bætti ein stúlka við "Já og þá dó mamma barnsins" (veit nú ekki hvaðan það kom... ).

Það eru mjög skemmtilegar stundir stundum í skólanum.